الجزء 2-تعلم القراءة باللغة الروسية
في نقطة هامة جدا لازم تحطها في الاعتبار وانت بتحلل الكلمة، اي هي؟
باختصار وببساطه وبدون تعقيدات، احنا قولنا ان الحروف المتحركة فيها 6 حروف تسمى بالحروف الصوتية، ال هي بتصدر صوت واحد فقط عند النطق، و4 حروف متحركة بتصدر صوتين عند نطقها، وال مشفش الدرس دا، من فضلك ارجع ليه لانه ضروري ومهم جدا.
الحروف الساكنة في اللغة الروسية قلنا انها عبارة عن 21 حرف،
منهم 5 حروف تصدر أصوات رنانة، والباقي حروف تسمى الحروف ذات الصوت الضوضائي، أو الناتجة عن حدوث ضوضاء، يعني ايه الكلام دا؟؟؟
قلنا قبل كده أن الزفير لما بيخرج من الرئة مرورا بالحنجرة والفم، بيلاقي حواجز داخل الفم، ال بينتج عنا صوت أو ضوضاء، عشان كده بتتكون أصوات الحروف الساكنة بالطريقة دي، كويس أوي، أصوات الحروف الساكنة دي منها ما يسمى أصوات الحروف الرنانة، ال هي بالروسية اسمها сонорные звуки، والنوع الثاني اسمه أصوات الحروف الضوضائية، шумные звуки، تمام جدا جدا
عاوزك تحفظ من الحروف دي 5 حروف مهمين جدا جدا جدا، وهي تقع تحت مسمى أصوات الحروف الرنانة في اللغة الروسية، сонорные звуки وهي الحروف н-м-р-л-й
وعشان متنسهاش، هنألف كلمة بالعربي اسمها ال ( نمر لي )، وهو ما يقابلها الحروف دي بالروسية
н-м-р л-й
كويس جدا،
نرجع لدرس слоги أو تحليل الكلمات إلى مقاطع صوتية
في قاعدة بتقولك التالي باللغة الروسية
عشان تحلل كلمة فيها أكتر من حرف ساكن ورا بعض، لازم نشوف الحروف الساكنة دي، هل هي تابعة لأصوات الحروف الضوضاء أو الحروف الرنانة؟؟
طيب نشوف مثال ونشرح عليه، يلا بينا
لو كانت الكلمة فيها حرفين ساكنين، وكان احد الحرفين دول من النوع сонорный звук والتاني من النوع шумный звук ، فنتصرف ازاي؟؟
في الحالة دي هنشوف ايه هو الحروف الأول، сонорный أو шумный ، تمام
ناخد مثال ، كلمة рифма بمعنى قافية
زي ما هو واضح، ان الكلمة دي بها حرفين ساكنين مع بعض لا يفصلهم حرف متحرك، طيب الحروف الأول عندنا هو حرف ф ودا حرف صوته шумный، التاني هو حرف м وهو حرف صوته رنان сонорный عشان كده في الحالة دي بنضم الحرفين دول مع بعض في مقطع واحد وهو المقطع الثاني وليس الأول ، يعني الكلمة هنقسمها كده ри-фма
تمام ، طيب لو كان الحرف الاول هو الرنان والثاني шумный هنتصرف ازاي،
نشوف مثال برده عشان نفهم عملي
كلمة корка بمعنى قشرة، عندنا حرفين ساكنين لازقين في بعض، وهم рк ، والكلمة دي فيها حرفين متحركين، يعني فيها مقطعين صوتيين، تمام
هنحلل الكلمة دي ازاي؟؟
في الحالة دي لازم نفصل الحرفين عن بعض، حرف هيكون مع المقطع الأول، والثاني هيكون مع المقطع الثاني،
يعني الحرف الأول الرنان هيفضل مع المقطع الأول والحرف الثاني шумный هينضم للمقطع الثاني
يبقى الكلمة هتكون على الشكل التالي кор-ка
نفهم من كده لو الحرفي الأول сонорный والتاني шумный يبفى نفصلهم عن بعض عند تحليل الكلمة وكل حرف هيكون في مقطع
ولوالعكس ، يبقى الحرفين هينضموا لبعض في المقطع الصوتي التاني كما في مثال كلمة рифма
تمام، الحالة الثالثة ،
لو كانت الكلمة فيها حرفين сонорные звуки
أنت الآن تتصفح الجزء الثاني 2-تعلم القراءة باللغة الروسية
مثال، كلمة полный
في الحالة دي ممكن نحلل الكلمة بطريقتين، والطريقتين صح،
الأولى نفصل بين الحرفين الرنانين п-л كل وحد في مقطع، يعني الكلمة على الشكل دا هنحللها
Пол-ный
وبرده ممكن الطريقة دي، по-лный
يعني ممكن نفصل الحرفين عن بعض كل واحد في مقطع، أو نضم الحرفين لبعض في المقطع التاني، وكلا الطريقتين صح
تمام، نشوف الحالة الرابعة،
لو كانت الكلمة بها حرفين ساكنين تابعين لمجموعة шумные звуки يعنى الأصوات الضوضائية، ففي الحالة دي واحنا بنقسم الكلمة وبنحللها، لازم نضم الحرفين دول مع بعض في مقطع واحد ونضمهم إلى المقطع الثاني
تمام ، نشوف مثال
أنت الآن تتصفح الجزء الثاني 2-تعلم القراءة باللغة الروسية
كلمة اكتوبر октябрь ، زي ما احنا شايفن أن فيها كم حرف متحرك،؟ فيها حرفين متحركين، о – я اذا الكلمة دي هيكون فيها مقطعين صوتين، تمام اوي
المقطع الاول о- والمقطع الثاني ктябрь
هنا انا فصلت المقطع الأول لوحده وال هو اصبح حرف о ، والحرفين الساكنين ضمتهم على بعض في المقطع الثاني ال بيضم الحرف المتحرك я
الحالة الخامسة والأخيرة، هي تخص حرف й
طبعا الحرف ده ساكن من الحروف الرنانة زي ما قلنا قبل كده، ، وفي الحالة دي القاعدة بتقول اذا جاء الحرف الساكن الرنان й وبعده حرف ساكن آخر من النوع الرنان сонорный أو шумный
فيجب فصل الحرفين عن بعضهم كل واحد في مقطع
طيب نشوف مثال على طول عشان نطبق عملي، هناخد كلمتين ، كلمة فيها حرف й معاه حرف رنان برده،
وكلمة فيها حرف й معاه حرف шумный
الكلمة الأولى هي كلمة حرب война، في الكلمة دي شايفن ان فيها حرفين ساكنين جنب بعض، وهما حرف й وبعده حرف н، والحرفين دول من النوع сонорный ، في الحالة دي هنفصل بينهم، وكل حرف فيهم هيكون في مقطع
вой-на
الكلمة التانية هي كلمة طائر تشايكا أو النورس، чайка، في الكلمة دي الحرف й جا مع الحرف к ، والحرفين دول واحد رنان وهو й والتاني шумный وهو к
وزي ما القاعدة بتقول، في الحالة دي أيضا لابد من فصل الحرفين عن بعض كل واحد في مقطع،
يعني هنحلل الكملة كده чай-ка
في حالة اخيرة بس مش بتتكرر كتير، وهي الحروف المكررة الساكنة جنب بعض في الكلمة، هنتصرف معاها ازاي؟؟؟
مثال ванна بمعنى حمام، وكلمة касса بمعنى كاشير
في الحالة دي بنضم الحرفين إلى المقطع الصوتي الثاني
يعني ванна هتصبح ва-нна ، وكلمة касса هتصبح ка-сса
تمام، وكده بنكون خلصنا الجزء التاني من تحليل الكلمات الروسية إلى مقاطع صوتية، لو فهمت الجزء الأول والثاني، اضمن لك باذن الله تعالى أنك تحلل وتقرأ أي كلمة روسية مهما كان طولها وصعوبتها،
فقط التدريب ثم التدريب ، شكرا لكم ، اشوفكم الدرس القادم
تم الانتهاء من درس الجزء الثاني 2-تعلم القراءة باللغة الروسية